Curiosidades

Compadri Pericu:
¡ si vieras que negras
las pasmus tíu Roqui y yo juntos
cuandu juimus a vel las colmenas !
Te aviertu que nunca
me gustarun a mi las abejas,
que por esu no tengu yo corchus
ni cosechu una pisca de cera.
Pero el lunis pasau
tiu Roqui Cabrera
s´empeñó que nos juéramus juntus
a un asientu
que está en las Corchuelas,
y llevamus toítus los trastis
pa castrallas si estaban ya buenas.
Allegamus; se pusu el tíu Roqui
la su capilleja,

-lo mesmu compadri
que una alambrera,
y me dió a mi otra
animándumi d´esta manera:
-No juyas, Franciscu
aunque piquin de duru y de priesa,
que raspandu la manu en el corchu
pa qu´el cachu e rejón salga juera,
te queas tan frescu;
¡ ni escuedi siquiera !
¡ Juy compadri, que suoris m´entrarun
con aquella endiablá capilleja;
¡ juy compadri, qu´ajinus, qu´ajogus
pa poelmi tapal la cabeza !;
y aluegu que tuvi
la careta puesta
tropezaba con toitus los rollus,
atrancaba con toitas la peñas,
y aquí qu´abodina
allá qu´endereda,
mediu tontu y molíu el tu compadri
llegó a la colmena.

Antigua foto de los protagonistas de esta historia

De izq. a dcha.: Compadri Pericu, Tíu Roqui Cabrera y Franciscu.

Mientras tantu tenía yo las manus
bien metías en las mis faldiqueras,
que los vuelus y aquellus zumbíus
que sonaban al pie las orejas
me tenían con los pelus en pinchu,
me tenían atontá la cabeza.
Cogimus un corchu
qu´estaba a una vera;
le arrancó tíu Cabrera los viru
con la punta de una sitaera,
los pusu allí a un lau,
quitó la tapaera
¡ y compadri !...
¡ lo mesmu, lo mesmu
me paicían las abejas que fieras!...
¡ Paici mentira
que jueran las mesmas
las que jadin aquellas casinas
tan bonitas de miel y de cera,
y que pican tan duru, tan rediu
si te agüelin al pie e la colmena !
El tíu Roqui encendió un zajumeriu
pa que las abejas
entontás y ajogás con el jumu
del asientu a cien leguas se jueran,
y poellas castral mu trnaquilus,
y traelmus la miel y la cera;
según piensu lo jidu a la contra
encendiénduli aquella jumera,
porque, ¡ mia que venían abejinas
de toas partis a aquella colmena !;
tiu Roqui me idía
que toas d´allí eran...
tan chiquinas , me paici mentira
que ca una su corchuu se sepa.
Tíu Roqui me diju:
¿No ves las abejas
comu andan por la cima e las manus
sin picalmi un poquinin siquiera?
Pué que conozan al amu,
-le diji,- que él anda con ellas;
peru yo l´había vistu
qu´en la corteda
de los corchus rascaba las manus
y también le vi jadel muecas,
aunque na se pué idil que yo vía
enzonchau en aquella careta...

A to estu, barruntu una cosa
en el joyu el pescuezu, o muy cerca,
y al echal la manu
pa enteralmi qu´era,
¡ me jincarum ma e venti rejonis
las indinas de aquellas abejas !...

¡ Juy compadri ! ¡ Que saltus,
que ajinus, que bregal !;
me pusi ñiervosu,
tiré la careta,
y roandu y tumbandu los corchus
pateé casi toa la colmena,
y me juí dutandu,
por aquella sierra
muchu más qu´una liebri
que la siguin los perrus de cerca...

¡ Juy compadr i...¡ que indinas !;
me pusierun igual qu´una breva;
estaban rabiosas,
picaban mu perras...
y pueu dal gracias
qu´en el riu me planté de carrera,
y sin na, sin aldal reparandu
en el sitiu qu´era
me tiré a bañalmi,
jundí la cabeza,
naé jadí aentru,
salí jadia juera
y to se volvía refregalmi
las picás con el barru y la arena...
¡ Juy compadri !...
¡ Lo mesmu, lo mesmu
trenía las orejas
de jinchás, comu están las morcillas
de bondongu que jadi tu suegra !...

¡ Juy compadri !; ¡ qu´ajogus !
¡ qu´abejas mas perras !...
Ya pué venil el tíu Roqui
preguntandu si voy a colmenas,
que le sueltu una fresca más grandi
que venti dejesas,
y le digu: a mí enjamás nunca
m´ha gustau el bregal con abejas;
por esu no tengo
ni media colmena;
el que quiera, que vaya a castrallas
y me traiga la miel sin abejas.

José Mª Vecino

Publicado en verano de 1923 en “El Cronista”, revista quincenal de Serradilla, editada y dirigida por D. Agustín Sánchez Rodrigo.